Nyathi Kich Kore Tek

Riyo ohinga, luya chwerna, kudho chuoya to pod adhi adhiya,

Waya oramo ni nyaka atiek keyo kendo tijena ma pile nyaka ati atiya

Ka mano ok nyalre to kawuono ok adhi chiemo e ode

Katieko puro to nyaka amany yien e gode

Kaeto aomo pii e aora kendo apong'ogo aguche

Nyathi kich kere tek kendo ochamo mana luche

Mama dibedie, Mama Nyakobura dibedie e bwo pinyka

Awuoro lowo jajuok mad ne oweyi to oika

Paro chanda kaparo hera ma niheragodo Min Oywa

Nadhi sikul, tarwakora maler, tatugo gi nyithindo ajwa

Tinde kinda gi sikul orumo, adong' e dhoot gi akuche

Nyathi kich kore tek kendo ochamo mana luche

Kaparo gima nyocha wuon Otieno otimona

Pi wang'a luoka kendo iya ludore mamana

Nyathi ma ating'oni adwa tero kure jodalawa

Pinyni agonda achom kure jowadwa

To kara jokma wuondore ni gin wede kara gin mana ngoche

Nyathi kich kore tek kendo ochamo mana luche

Wuonwa ne jasunga kendo ne oritowa maber

Gige notimo e yo moriere kendo wechene ne ler

To tuo mar ayaki omaya joherana duto e diemo wang'

Omiyo tinde asandora to aywagora wang' ka wang'

Wuod Seme ne wuoyi ma wiye tiyo kendo ne en janga'd buche

Nyathi kich kore tek kendo ochamo mana luche

We ago kwer mondo atiek keyo

Duonda to otuo kururu awinjo riyo

Kara mae miluongo ni ahero onge yueyo

Ka waya oyudo kapok atieko to onge wuoyo

Boka chwadore ma nyona e kuoyo

Nyathi kich kore tek kendo ochamo mana luche

To kara jonyuol ok onego otho chon

Onego gibedi gine kaka nyithindgi pon

Gitergi e sikul kata giholo mana loan

Kik jomodong' lok nyithindgi mon

Igoyo negi koko ka ng'ama goyo hon

Nyathi kich kore tek kendo ochamo mana luche!